Օրերս ավարտվեց Հայկական Կարիտասի կողմից ֆինանսավորված ,,Վարպետաց տուն,, մասնագիտական ուսուցման կենտրոնի ստեղծման պիլոտային ծրագիրը: Փայտի փորագրության, հելյունագործության և պոլիմերային կավի դասարաններին մասնակցելու հնարավորություն ունեցան շուրջ 50 երեխաներ և երիտասարդներ սոցիալապես անապահով ընտանիքներից:
Երեխաները և երիտասարդները ստացան այնպիսի մասնագիտություններ, որոնց շնորհիվ կարող են ինքնուրույն պատրաստել որակյալ, գեղեցիկ և պիտանի իրեր ինչպես տնային օգտագործման, այնպես էլ վաճառելու համար, ինչը հնարավորություն կտա բարելավել նրանց ընտանիքների սոցիալական վիճակը:
Ծրագիրը նաև ինքնատիպ սոցիալական վերականգնման նպատակ ուներ: Մեկ դասարանում իրար հետ միասին սովորում էին երեխաներ առանց որևէ խտրականության: Բացի մասնագիտությունիցն նրանք սովորեցին նաև կյանքի հմտություններ՝ փոխադարձ հարգանք և հանդուրժողականություն:
,,Ինչ ափսոս, որ դասերը ավարտվեցին.....բայց ես ուրախ եմ, որ արդեն ունեմ ընկերներ և կարողանում եմ մայրիկիս համար տարբեր իրեր հելյունագործել,,- ասաց 14 տարեկան Մարիամիկը:
,, Թոռնիկս վազքով տուն ընկնելով ասաց. ,, Տատիկ, տատիկ, տես ինչ եմ կարողացել պատրաստել փայտից, ես սա ինքս եմ փորագրել,,- պատմում էր Նարեկի տատիկը: Իր խոսքերով, դա իր ամենաերջանիկ օրերից մեկն էր, քանի որ նա, բացի ուրախությունից, թոռնիկի աչքերում տեսավ վստահություն և համարձակություն: